ԵՄ-ն ու Հայաստանը հաջողությամբ ամփոփեցին միջուկային անվտանգության կարգավորող դաշտի արդիականացման ծրագիրը

ՀՀ միջուկային անվտանգության կարգավորման կոմիտեն (ՄԱԿԿ), Միջուկային և ռադիացիոն անվտանգության գիտատեխնիկական կենտրոնը (ՄՌԱ ԳՏԿ) և «IDOM» միջազգային խորհրդատվական ընկերությունը հաջողությամբ ավարտեցին իրենց երկամյա ինտենսիվ համագործակցության ծրագիրը։ Դրա հիմնական նպատակն էր Հայաստանի միջուկային և ճառագայթային անվտանգության կարգավորող դաշտի արդիականացումն ու կատարելագործումը, ինչպես նաև դրա հետագա համապատասխանեցումը Եվրոպական միության (ԵՄ) դիրեկտիվներին՝ ՀՀ-ԵՄ Համապարփակ և ընդլայնված գործընկերության համաձայնագրի (Comprehensive and Enhanced Partnership Agreement) պահանջներին և ստանձնած հանձնառություններին,  Արևմտաեվրոպական միջուկային կարգավորողների ասոցիացիայի (WENRA) անվտանգության հիմնարար մակարդակներին (Safety Reference Levels) և միջազգային առաջավոր փորձին համահունչ:

Համագործակցության 2 տարիների ընթացքում ՄԱԿԿ-ի, ՄՌԱ ԳՏԿ-ի և «IDOM»-ի փորձագիտական թիմերը սերտ համագործակցությամբ իրականացրել են օրենսդրական բացերի համապարփակ վերլուծություն, մշակել կարգավորող փաստաթղթերի նախագծեր և արդյունքում ձևավորվել է առաջարկությունների փաթեթ՝ ազգային օրենսդրության մեջ անվտանգության միջազգային չափանիշների ինտեգրման նպատակով։ Ծրագրի շրջանակներում առանձնակի ուշադրություն է դարձվել կարգավորող վերահսկողության ուժեղացմանը, լիցենզավորման գործընթացների օպտիմալացմանը և ճառագայթային պաշտպանության միջոցառումների՝ արդի բարձրագույն պահանջներին համապատասխանության ապահովմանը։

CEPA համաձայնագրի պահանջներին և ստանձնած հանձնառությունների իրականացման նպատակով տրվել է ավելի քան 40 իրավական ակտերում փոփոխություններ կատարելու առաջարկ։

Ծրագրի շրջանակում կարգավորող մարմնի օրենսդրական դաշտի Եվրատոմի դիրեկտիվներին ներդաշնակեցումից բացի, անդրադարձ է կատարվել նաև ռադիոակտիվ թափոնների պահեստարանների շահագործման և ռադիոակտիվ թափոնների վերամշակման տեղակայանքների անվտանգության հիմնավորման մոտեցումներին։

Բացի կարգավորող փաստաթղթերի մշակումից, այս գործընկերությունը նպաստել է նաև կարգավորող մարմնի տեխնիկական կարողությունների զգալի հզորացմանը՝ գիտելիքների փոխանցման և համատեղ գնահատումների միջոցով։ Այս ծրագիրը կարևոր ձեռքբերում է թափանցիկ, անվտանգ և միջազգային չափանիշներին համապատասխան միջուկային էներգետիկայի կառավարման ոլորտում Հայաստանի որդեգրած հանձնառության ճանապարհին՝ ապահովելով հուսալի անվտանգության ենթակառուցվածք գալիք տասնամյակների և սերունդների համար։