«Ցածր ցիկլային հոգնածության վերլուծություն, մնացորդային կյանքի տևողության գնահատում և ծերացման ժամանակային սահմանափակումների վերլուծություն» խորագրով տարածաշրջանային աշխատաժողով Երևանում

Ատոմային էներգիայի միջազգային գործակալության (ԱԷՄԳ) տեխնիկական համագործակցության (ՏՀ)՝  ME-RER2019-EVT2500794 ծրագրի շրջանակներում  2026 թվականի ապրիլի 8-ից 10-ը Երևանում անցկացվեց տարածաշրջանային աշխատաժողով «Ցածր ցիկլային հոգնածության վերլուծություն, մնացորդային կյանքի տևողության գնահատում և ծերացման ժամանակային սահմանափակումների վերլուծություն» (Regional Workshop on Low Cycle Fatigue Analysis, Residual Lifetime Assessment and Time Limited Ageing Analysis (TLAAs))» խորագրով։

Աշխատաժողովին մասնակցում էին ME-RER9161 ծրագրում ներգրավված ԱԷՄԳ-ի անդամ պետությունները՝ Հայաստանը, Խորվաթիան և Ուկրաինան, ինչպես նաև ԱԷՄԳ-ի միջազգային փորձագետներ Նիդերլանդների Թագավորությունից և Չեխիայի Հանրապետությունից։

3-օրյա աշխատաժողովի նպատակն էր համախմբել մասնագետներին և շահագրգիռ կողմերին փորձի փոխանակման և տարբեր երկրների մոտեցումների քննարկման համար՝ հատուկ ուշադրություն դարձնելով ՋՋԷՌ (VVER) տեխնոլոգիային։

Գործնական քննարկումներ տեղի ունեցան հետևյալ թեմաների շուրջ․

• Հոգնածության հաշվարկների առկա մեթոդաբանությունների և դրանց հետ կապված ծերացման կառավարման գործողությունների վերաբերյալ, ներառյալ՝ կապը ԱԷԿ-ի այլ ծրագրերի հետ, ինչպիսիք են տեխնիկական սպասարկումը և շահագործման ընթացքում իրականացվող ստուգումները։
• հիմնական բաղադրիչների տեխնիկական վիճակի և մնացորդային ռեսուրսի գնահատման ասպեկտների վերաբերյալ։
• Իրազեկվածության բարձրացում և տեղեկատվության տրամադրում մասնակից ԱԷԿ-ներին և կարգավորող մարմիններին ԱԷՄԳ-ի անվտանգության ստանդարտների վերաբերյալ՝ կապված TLAA-ների, ծերացման կառավարման և երկարաժամկետ շահագործման հետ։

Միջոցառումը ներառում էր ԱԷԿ-ների հիմնական մեխանիկական տարրերի (որոնք ենթակա են ցածր ցիկլային հոգնածության) ծերացման կառավարման և ժամանակային սահմանափակումների վերլուծության (TLAA) վերաբերյալ ԱԷՄԳ-ի ընթացիկ պահանջների ու ուղեցույցների, ինչպես նաև Նիդերլանդների Թագավորությունում և Չեխիայի Հանրապետությունում կիրառվող ազգային մոտեցումների ներկայացումը։