Խաչատուր Խաչիկյանը նշանակվել է ՀՀ Միջուկային անվտանգության կարգավորման կոմիտեի նախագահ

Հայաստանի Հանրապետության կառավարության 2026 թվականի սեպտեմբերի 3-ի N 1293-Ա որոշման համաձայն, Խաչատուր Խաչիկյանը նշանակվել է ՀՀ Միջուկային անվտանգության կարգավորման կոմիտեի նախագահի պաշտոնում։

Խաչատուր Գառնիկի Խաչիկյանը 1987-1996թթ. սովորել և ավարտել է Երևանի Կ․ Մարքսի անվան պոլիտեխնիկական ինստիտուտը մագիստրոս որակավորման աստիճանով։

Աշխատանքային գործունեությունը սկսել է «Հայկական ատոմային էլեկտրակայան» ՓԲԸ-ում՝ 1996-2000 թթ.  աշխատելով որպես ճարտարագետ, ապա 2000-2003 թթ.՝ ռեակտորի ղեկավարման առաջատար ճարտարագետ։ 2003-2008 թթ. ստանձնել է ռեակտորային արտադրամասի հերթափոխի պետ պաշտոնը, ապա 2008-2010 թթ.՝ տուրբինի ղեկավարման առաջատար ճարտարագետ։

2010-2015 թթ. աշխատել է ՀՀ կառավարությանն առընթեր միջուկային անվտանգության կարգավորման պետական կոմիտեում որպես աշխատակազմի միջուկային անվտանգության վարչության համակարգերի և կոմպոնենտների բաժնի պետ-պետական տեսուչ, 2015-2017 թթ.՝ ՀՀ կառավարությանն առընթեր միջուկային անվտանգության կարգավորման պետական կոմիտեի աշխատակազմի ղեկավար։ 2017-2018 թթ. Ստանձնել է ՀՀ կառավարությանն առընթեր միջուկային անվտանգության կարգավորման պետական կոմիտեի նախագահի տեղակալի պաշտոնը, ապա՝ 2018 թ. օգոստոսի 2-ից նշանակվել է Միջուկային անվտանգության կարգավորման կոմիտեի նախագահի առաջին տեղակալ։  2022 թվականից կատարում էր Կոմիտեի նախագահի պարտականությունները։

Այս նշանակումը կարևոր փուլ է Հայաստանի միջուկային և ռադիացիոն անվտանգության պետական վերահսկողության շարունակական կատարելագործման, միջազգային չափանիշներին համապատասխանեցման և ոլորտում արդյունավետ կառավարման ապահովման գործում։ Խաչատուր Խաչիկյանի ղեկավարությամբ Կոմիտեն շարունակելու է ամրապնդել միջուկային անվտանգության վերահսկողությունը, զարգացնել միջազգային համագործակցությունը և կատարելագործել կարգավորող շրջանակը՝ ապահովելով ոլորտի կայուն և անվտանգ զարգացումը։